İmam Baqir (ə) buyurdu: “Uca Allah öz rəsuluna (s) Əlinin (ə) vilayətini tanıtmağı əmr etdi və onun üçün ayə nazil etdi: “Həqiqətən, sizin başçınız və işlərinizin ixtiyar sahibi yalnız Allah, Onun Peyğəmbəri və iman gətirənlər – namaz qılıb rüku halında zəkat verən kəslərdir”. Allah vilayəti birinci dəfədən vacib etmişdi, lakin (insanlar) onun nə olduğunu (mahiyyətini) bilmədilər. Uca Allah Məhəmmədə (s) əmr etdi ki, namazı, zəkatı, orucu və həcci onlar üçün açıqladığı kimi, vilayəti də açıqlasın. Bu əmr Allah tərəfindən gəldikdə Allah rəsulu (s) insanların dinlərindən üz çevirməyindən, (insanların) onu yalançı adlandırmasından qorxduğu üçün qəlbi sıxıldı. O öz rəbbinə sarı üz çevirdi. Uca Allah ona (s) belə vəhy etdi: “Ey Peyğəmbər, rəbbin tərəfindən sənə nazil olanı çatdır! Əgər (bunu) etməsən, (elə bil ki,) onun (heç bir) tapşırığını çatdırmamısan. Allah səni insanlardan (onların fitnə və şərindən) qoruyacaq. Şübhəsiz, Allah kafirlərin dəstəsini hidayət etməz”. Həzrət Peyğəmbər (s) sıxıntı və çətinlikləri aşaraq rəbbinin əmri və onun köməyi ilə Qədir-Xum günü Həzrət Əlinin (ə) vilayətini təqdim etməyə durdu. Camaat namazında insanlara əmr etdi ki, orada (Qədir-xumda) olanlar bu hadisəni orada olmayanlara çatdırsın!” İmam Baqir (ə) buyurdu: “Bir zamanlar vacibatlar ardıcıllıqla nazil olurdu. Vilayət isə axırıncı vacibatlardan idi. Necə ki bunun haqqında Allah-taala ayə nazil etdi: “Bu gün dininizi sizin üçün kamilləşdirdim və sizə öz nemətimi tamamladım”. İmam Məhəmməd Baqir (ə) belə buyurdu: “Uca Allah buyurdu: “Bu vacibdən (Həzrət Əlinin vilayətindən) sonra sizlərə bir vacib nazil olmamışdır. Artıq vacibatları sizlər üçün tamamladım”.